ఆకులో ఆకునై పూవులో పూవునై
కొమ్మలో కొమ్మనై నునులేత రెమ్మనై
  ఈ యడవి దాగిపోనా
             ఎట్లైనా
  నిచటనే యాగిపోనా?

 గల గలని వీచు చిరుగాలిలో కెరటమై
 జల జలని పారు సెలపాటలో తేటనై
  ఈ యడవి దాగిపోనా
            ఎట్లైనా
 నిచటనే యాగిపోనా?
 పగడాల చిగురాకు తెరచాటు తేటినై
 పరువంపు విరిచేడె చిన్నారి సిగ్గునై
   ఈ యడవి దాగిపోనా
            ఎట్లైనా
  నిచటనే యాగిపోనా?
 తరు లెక్కి యల నీలి గిరినెక్కి మెలమెల్ల
 చద లెక్కి జలదంపు నీలంపు నిగ్గునై
   ఈ యడవి దాగిపోనా
            ఎట్లైనా
   నిచటనే యాగిపోనా?  
  ఆకలా దాహమా చింతలా వంతలా
  ఈ కరణి వెర్రినై యేకతమా తిరుగాడ
   ఈ యడవి దాగిపోనా
            ఎట్లైనా
   నిచటనే యాగిపోనా

                  “మేఘసందేశం” చిత్రం నుంచి