ఆకులో ఆకునై పూవులో పూవునై
కొమ్మలో కొమ్మనై నునులేత రెమ్మనై
ఈ యడవి దాగిపోనా
ఎట్లైనా
నిచటనే యాగిపోనా?
గల గలని వీచు చిరుగాలిలో కెరటమై
జల జలని పారు సెలపాటలో తేటనై
ఈ యడవి దాగిపోనా
ఎట్లైనా
నిచటనే యాగిపోనా?
పగడాల చిగురాకు తెరచాటు తేటినై
పరువంపు విరిచేడె చిన్నారి సిగ్గునై
ఈ యడవి దాగిపోనా
ఎట్లైనా
నిచటనే యాగిపోనా?
తరు లెక్కి యల నీలి గిరినెక్కి మెలమెల్ల
చద లెక్కి జలదంపు నీలంపు నిగ్గునై
ఈ యడవి దాగిపోనా
ఎట్లైనా
నిచటనే యాగిపోనా?
ఆకలా దాహమా చింతలా వంతలా
ఈ కరణి వెర్రినై యేకతమా తిరుగాడ
ఈ యడవి దాగిపోనా
ఎట్లైనా
నిచటనే యాగిపోనా
“మేఘసందేశం” చిత్రం నుంచి
మే 7, 2008. దేవులపల్లి కృష్ణశాస. .
నా హృదయమందు …
నా హృదయమందు …
నా హృదయమందు విశ్వవీణాగళమ్ము
భోరుభోరున నీనాడు మ్రోతవెట్టు;
దశదిశాతంత్రులొక్క సుధాశ్రుతిని బె
నంగి చుక్కలమెట్లపై వంగి వంగి
నిలిచి నిలిచి నృత్యోత్సవమ్ముల చలించు.
వెలుగులో యమృతాలొ తావులొ మరేవొ
కురియు జడులు జడులు గాగ, పొరలి పారు
కాలువలుగాగ, పూర్ణకల్లోలములుగ;
కలదు నాలోన క్షీరసాగరము నేడు!
దారిదొరకని నా గళద్వారసీమ
తరగహస్తాల పిలుపుతొందర విదల్చు!
మోయలేనింక లోకాలతీయదనము!
ఆలపింతు నానందతేజోంబునిధుల!
ప్రేయసి! చలియింపని నీ
చేయి చేయి కీలింపుము
చలియించెడు నా కంఠము
నిలిచి నిలిచి పాడగా!
ఊర్వశి! ఊర్వశి! నాతో
ఊహాపర్ణాంచలముల
వెర పెరుగని కను మూయుము!
తిరుగురాని దొరకబోని
శీతాచల శిఖరోజ్వల
హిమపీఠాగ్రమున కెగసి
శిరములెత్తి కరములెత్తి
కురియింతమొ, వినిపింతమొ,
మేలుకొనిన శ్రుతులనంత
కాలమె వికసించి వినగ,
గంగా పవిత్రకాంతుల!
యమునా శీతలమధువుల!
“ఊర్వశి” నుంచి
మే 1, 2008. దేవులపల్లి కృష్ణశాస. .
నా కుగాదులు…
నా కుగాదులు లేవు
నా కుషస్సులు లేవు
నేను హేమంత కృ
ష్ణానంత శర్వరిని.
నాకు కాలమ్మొక్క
టే కారురూపు, నా
శోకమ్మువలెనె, నా
బ్రతుకువలె,
నా వలెనె.
“ప్రవాసి” నుంచి
ఏప్రియల్ 23, 2008. దేవులపల్లి కృష్ణశాస. .
గీతము 59
నా కేల ఒక జోలె,
నాలో అమృత వీణ
ఉంచి నను లె మ్మందువా !
దేవ
ఊరకే పొమ్మందువా !
నాలుగూ దిక్కులా
నడిమి స్వర్గమ్ములో
ప్రతి ఇంటి మోసాల ఆగనా !
దేవ
ప్రతి గుండె మోసాల మ్రోగనా !
పాడి పాడీ, నృత్య
మాడి ఆడీ, నిన్ను
వేడి వేడీ పొరలనా !
ప్రతి గుండె
తోడ కూడీ తరలనా !
నాలుగూ దిక్కులా
నడిమి స్వర్గ మ్మంత
గంధర్వ సీమగా చేయనా !
దేవ
గాన సౌధమ్ముగా చేయనా !
విరిసి విరిసీ, తేనె
కురిసి కురిసీ దెనల
దరిసి దరిసీ పొరలనా !
ప్రతి గుండె
నొరసి యొరసీ తరలనా!
నాలుగూ దిక్కులా
నడిమి స్వర్గ మ్మంత
పూల పందిరి చేయనా !
దేవ
బృందావనము చేయనా !
తేలి తేలీ, అలల
తూలి తూలీ, చదల
సోలి సోలీ పొరలనా !
ప్రతి గుండె
మాల లల్లీ తరలనా !
నాలుగూ దిక్కులా
నడిమి స్వర్గ మ్మంత
పాల కదలిగ చేయనా !
దేవ
పండు పున్నమి చేయనా !
తలపు తలపూ జ్యోతి,
పలుకు పలుకూ గీతె,
పనులన్ని ప్రణయముగ చేయనా !
దేవ !
ప్రతి గుండె నీ గాథ పోయనా !
నాలుగూ దిక్కులా
నడిమి స్వర్గ మ్మంత
మూల మూలల నడుతునా
నా దేవ
వేల వేలల విడుతునా !
న న్నొక్క జోలెగా,
న న్నమృత వీణగా
తడయ కిక రమ్మందువా !
ప్రతి గుండె
విడియగా తెమ్మందువా !
నాలుగూ దిక్కులా
నడిమి స్వర్గమ్ముతో
గంగలా కడలిలో దూకనా !
దేవ
పొంగుతూ అడుగులా తాకనా !
ఏప్రియల్ 15, 2008. దేవులపల్లి కృష్ణశాస. .
గీతము 58
నా నోట నీ మాట గానమయ్యే వేళ
నా గుండె నీ వుండి మ్రోగింపవా వీణ?
రాగ మెరుగని వీణ,రక్తి నెరుగని వీణ
తీగపై నీ చేయి తీయకే గడెయేని !
అంతరాంతరము నీ అమృత వీణే యైన
మాట కీర్తన మౌను, మనికి నర్తన మౌను !
ఈ అనంత పథాన ఏ చోటి కా చోటు
నీ ఆలయ మ్మౌను, నీ ఓలగ మ్మౌను!
అడు గడుగునకు స్వామి అడుగు సవ్వడి వినిన
ఎడద లోలోన ఎల్లెడల విశ్వము లోన
ఈ యాత్ర ముగియునో ఏ వేల దిగుదునో,
హాయిగా చల్లగా సాగిపోవుదు నంతె!
దేవదేవా !మహాదేవ !లోకేశ్వరా!
దీనబంధూ !దయాసింధూ! ప్రాణేశ్వరా!
గడెయేని నీ వియోగము సహింపగలేను
విడిపోని నీ చెల్మివిధ మేమొ సెలవిమ్ము !
డిసెంబరు 8, 2007. టాగులు: Devulapalli, Devulapalli Krishna Sastry, Telugu kavitalu. దేవులపల్లి కృష్ణశాస. .
