చందమామ రావె జాబిల్లి రావె

కొండెక్కి రావె కోటి పూలు తేవె

బండెక్కి రావె బంతిపూలు తేవె

తేరుమీద రావె తేనెపట్టు తేవె

పల్లకిలో రావె పాలు పెరుగు తేవె

పరుగెత్తి రావె పనసపండు తేవె

నా మాట వినవె నట్టింట బెట్టవె

అన్నీని తేవె అబ్బాయి కియ్యవె

          “మన పిల్లల పాటలు” నుంచి

కితకిత కితకిత

ఇల్లలికి – ముగ్గేసి
ఆకేసి – పీటేసి
పప్పెట్టి – బువ్వెట్టి
పాలోసి – పెరుగోసి
అత్తారింటికి – తోవేదంటే
కిత కిత కిత కిత – కిల కిల కిల కిల

ఉగాది పండుగ వచ్చింది
ఊరికి అందం తెచ్చింది
ఉత్సవాలతో దేవుళ్ళకు
ఊరేగింపులు సాగాయి
గుడిలో దేవుని పూజించి
గురువుల పెద్దలను రావించె
పంచాంగాలను చదివించె
మంచీ చెడ్డలు విన్నాము
అక్కలు బావలు ఆసలతో
చక్కావచ్చారు పండుక్కి
అమ్మ వేకువ లేచింది
అందరికి తలలు కడిగింది
సరిపడే నగలు ఇచ్చింది
సరిక్రొత్త బట్టలు పెట్టింది
కులదేవతలను కొలిచింది
గొప్పగా పూజలు చేసింది
ఊటలు నోట్లో ఊరంగా
ఉగాది పచ్చడి పెట్టింది
ఉగాది పండుగ వచ్చింది
ఊరికి అందం తెచ్చింది